Newest comedy film ni Direk Wenn,
mapapanood na sa October 10!
TONI, LUIS AT VICE, PROUD NA PROUD SA
“THIS GUY’S IN LOVE WITH YOU, MARE”
Full trailer pa lang, hagalpakan na sa katatawa ang buong sambayanan dahil sa mga kwelang patikim na eksena ng comedy box-office trio nina Toni Gonzaga, Luis Manzano, at Vice Ganda sa kanilang pinakaaabangang comedy film mula sa Star Cinema na "This Guy's In Love With You, Mare" na ipalalabas na sa mga sinehan nationwide sa October 10.
Sa ilalim ng direksyon ng box-office comedy director' na si Wenn V. Deramas, ang "This Guy's In Love With You, Mare" ang kauna-unahang pagsasama sa big screen nina Toni, Luis at Vice na pawang proud na proud sa sa kinalabasan ng kanilang pelikula.
“Ang ‘This Guy's In Love With You, Mare’ ay tungkol sa tatlong tao na pareho-parehong naghahanap ng puwesto nila sa mundong ito,” kwento ni Direk Wenn. “Si Vice as Lester, isa siyang pusong babae na sinentro ang buong buhay sa lalaking pinakamamahal niya na si Mike, si Luis ‘yun, na naghahanap naman ng isang normal na buhay na may asawa at may anak. Si Toni as Gemma, nasa sa point ng buhay niya na gusto na niya mag-asawa so tamang-tama ‘yung timing nilang dalawa ni Mike. Ang hindi niya alam, meron palang dark secret ang boyfriend niya.”
Ayon kay Toni, siguradong ikatutuwa ng moviegoers ang halos lahat ng eksena sa kanilang pelikula dahil todo-bigay sila dito nina Luis at Vice. "Ito na siguro ang pinakamasayang pelikulang nagawa ko sa tanang buhay ko. Parang at its highest level lahat ng eksena. Todo-bigay lahat," pahayag ni Toni. "Wala kaming tinipid dito, lahat ng ikasasaya ng tao ibinigay namin sa pelikulang ito."
Bago pa man nila i-shoot ang pelikula, ayon kay Luis, excited na siyang gawin ito hindi lamang dahil sa kakaibang love story na hatid nito kundi maging sa mga kaibigang makakatrabaho niya. "When they offered this project, siyempre nakita ko 'yung cast at 'yun pa lang enough na to get me excited," aniya. "Working with this cast, this unusual storyline, it's something I'll always treasure because it's not everyday na aalukin ang isang artista ng isang ganitong kaibang klaseng pelikula."
Samantala, lubos ang pagtitiwala ni Vice sa kakaibang ligayang ihahatid sa mga manonood ng pinakabagong niyang pelikula. “Ang intensiyon namin sa ‘This Guy's In Love With You, Mare’ ay mapatawa kayong lahat at alam kong maibibigay namin sa inyo ‘yan,” aniya. “Ihanda niyo na mga sarili niyo dahil pagpasok niyo pa lang ng sinehan may ngiti na kayo at pag-uwi niyo ng bahay ay may halakhak kayong bitbit at magiging masayang-masaya ang mga puso niyo.”
Bukod sa box-office trio nina Toni, Luis at Vice, bahagi rin ng "This Guy's In Love With You Mare" sina Edgar Mortiz, Buboy Garovillo, Gladys Reyes, DJ Durano, Karla Estrada, Carla Martinez, at Ms. Tessie Tomas. Kasama rin sa pelikula sina Jayson Gainza, Eagle Riggs, Ricky Rivero, IC Mendoza, Dang Cruz, Cecil Paz, Manuel Chua, Ricci Chan, Lassy, Tess Antonio, at Edward Mendez.
Huwag palampasin ang pinakamaagang pamasko ng Star Cinema na tiyak magpapakilig at magpapahalakhak sa buong sambayanan ang "This Guy's In Love With You, Mare" na ipalalabas na sa mga sinehan nationwide sa October 1O, 2012.
*FOR INSTANT UPDATES, FOLLOW US ON TWITTER*
*TO WATCH OUR WEB SHOWS, CLICK HERE*
No comments:
Post a Comment